Hrafnkatla

Búsetuúrræði

Við bjóðum upp á einstaklingsbundið búsetuúrræði fyrir börn og ungmenni sem þurfa öruggt og faglegt umhverfi með stöðugum stuðningi. Í búsetuúrræðinu fær einstaklingurinn aðstoð við daglegt líf, virkni og félagsleg samskipti.

Lögð er áhersla á traust samband, stöðugleika og er unnið að auknu sjálfstæði og jákvæðri framtíðarsýn. Umfang stuðnings og þjónustu er ákveðið í samráði við viðkomandi aðila.

Fjölskylduheimili

Fjölskylduheimilið Hrafnkatla er búsetuúrræði sem veitir 12–20 ára ungmennum öruggt og stuðningsríkt heimili. Á heimilinu er pláss fyrir allt að fjögur börn og unnið er út frá tengslamyndandi nálgun og gagnreyndum aðferðum.

Vistun til skamms- og langtíma. Við styðjum ungmenni í skóla, vinnu og félagslífi með gagnreyndum aðferðum og tengslamyndandi nálgun.

Bráðavistun

Við bjóðum bráðavistun fyrir ungmenni allan sólarhringinn, allt árið. Bráðavistun veitir skjól og öryggi í neyð og er hönnuð til að veita öruggt umhverfi þegar þörf er á brýnni aðstoð.

Hvíldar- og sumardvöl

Möguleiki er á reglulegri hvíldar- og sumardvöl, hvort sem er yfir helgi eða viku í senn. Þetta gefur börnum og fjölskyldum þeirra tækifæri til hvíldar í öruggu umhverfi.

Greiningar- og leiðbeiningarvistun

Hrafnkatla býður upp á greiningar- og leiðbeiningarvistun fyrir börn og foreldra sem þurfa stuðning við að takast á við uppeldi. Vistunin hentar foreldrum sem glíma við vanlíðan, áfengis eða vímuefnavanda, þurfa stuðning og leiðbeiningar eða þegar nauðsynlegt er að fylgjast sérstaklega með umönnun, samskiptum og öryggi barna.

Vistun fer fram í íbúð eða herbergi í húsnæði fyrir fjölskyldur, með það að markmiði að skapa öruggt og stuðningsríkt umhverfi þar sem börn og foreldrar geta unnið að framförum saman.

Einstaklingsstuðningur

Við bjóðum upp á einstaklingsstuðning fyrir börn og ungmenni. Stuðningurinn er sniðinn að þörfum hvers barns og fer fjöldi klukkustunda eftir samkomulagi og því sem óskað er.

Markmiðið er að efla sjálfstraust, félagsfærni og samfélagsþátttöku, auk þess að styðja barnið við að takast á við daglegar áskoranir í öruggu og hvetjandi umhverfi.

Foreldrafræðsla og uppeldisráðgjöf

Foreldrafræðsla og uppeldisráðgjöf er sérhæfð þjónusta fyrir fjölskyldur þar sem þörf er á markvissum stuðningi við foreldrahlutverkið. Vinnubrögð byggja á gagnreyndri þekkingu, viðurkenndum faglegum aðferðum og rannsóknum á þroska barna, tengslamyndun, áföllum og foreldrafærni.

Unnið er samkvæmt skýrum markmiðum að því að efla foreldravitund, styrkja foreldra í uppeldishlutverkinu og auka skilning þeirra á þörfum, þroska, líðan og hegðun barna. Foreldrar fá fræðslu, hagnýta leiðsögn og stuðning við að skapa öryggi og fyrirsjáanleika, setja skýr og hlý mörk, byggja upp jákvæð samskipti og bregðast við krefjandi hegðun á uppbyggilegan hátt.

Þjónustan byggist á skipulögðu ferli, reglubundinni eftirfylgd og faglegu mati á framvindu. Í lok þjónustutímabils er unnin greinargerð þar sem framkvæmd þjónustunnar, framvinda, helstu athuganir og faglegt mat á árangri og áframhaldandi stuðningsþörf eru tekin saman.

Þjónustunni er sinnt af fagfólki með menntun og reynslu á sviði foreldrafræðslu, uppeldisráðgjafar, þroskaþjálfunar og uppeldis- og menntunarfræði. Þjónustan er einstaklingsmiðuð og getur farið fram á heimili fjölskyldunnar, í viðtölum eða með lifandi leiðsögn í raunverulegum aðstæðum daglegs lífs.

Stuðnings- og ráðgjafaþjónusta

Hrafnkatla veitir fjölbreytta og sveigjanlega stuðnings- og ráðgjafaþjónustu fyrir börn, ungmenni og fjölskyldur. Starfsmenn geta tekið að sér verkefni samkvæmt óskum og þörfum barnaverndar, félagsþjónustu og annarra samstarfsaðila. Þjónustan getur meðal annars falist í stuðningi á heimili, tímabundinni vistun á heimili, fylgd og stuðningi í ferðalögum, stuðningi við skóla- og frístundastarf og öðrum sértækum verkefnum. Umfang, framkvæmd og markmið þjónustunnar eru aðlöguð að hverju máli.

Eftirlit með umgengni

Við bjóðum upp á eftirlit með umgengni með því markmiði að tryggja öryggi barnsins og stuðla að jákvæðri, öruggri og innihaldsríkri gæðastund milli barns og foreldris.

Óboðað eftirlit

Við bjóðum upp á óboðað eftirlit á heimili foreldra og barna þegar þess er óskað. Markmiðið er að tryggja öryggi barnsins og fylgjast með að aðstæður séu viðunandi og í samræmi við þarfir barnsins.

Handleiðsla fyrir fósturforeldra

Hrafnkatla býður faglega handleiðslu fyrir fósturforeldra sem annast börn og ungmenni með fjölþætta áfallasögu, tengslavanda, hegðunar- og tilfinningavanda eða aðrar áskoranir sem geta haft áhrif á daglegt líf og samskipti innan fósturfjölskyldunnar.

Handleiðslan miðar að því að styrkja fósturforeldra í hlutverki sínu, auka skilning á hegðun barnsins og þeim þörfum sem geta legið að baki og styðja við uppbyggingu öruggra og stöðugra tengsla. Áhersla er lögð á hagnýtar leiðir til að takast á við krefjandi aðstæður, setja skýr og hlý mörk, stuðla að fyrirsjáanleika og vinna með hegðun út frá þroska, tengslum og fyrri reynslu barnsins.

Sérstök áhersla er lögð á þann veruleika sem fylgir fósturforeldrahlutverkinu. Þar getur meðal annars reynt á samskipti við kynforeldra og aðstandendur, samstarf við barnaverndarþjónustu og aðra fagaðila, umgengni, breytingar á vistun og þær tilfinningalegu áskoranir sem geta fylgt því að annast barn sem hefur upplifað óöryggi eða áföll.

Handleiðslan byggir á víðtækri reynslu af vinnu með börnum og ungmennum með fjölþættan vanda, foreldrasamskiptum og samstarfi innan barnaverndarkerfisins ásamt foreldrafræðslu og uppeldisráðgjöf. Markmiðið er að veita fósturforeldrum faglegt rými til að ræða aðstæður, fá leiðsögn og ígrundun og finna raunhæfar leiðir sem styðja bæði við þarfir barnsins og stöðugleika fósturfjölskyldunnar.